افتكرني

(( افتكـرنـي ))

لما تحس انك وحيد
ضايع وحزين
ماشي في ليل طويل
وحواليك سكون وهدوء
ومفيش اي بشر
وغايب عن سما وجودك
نور القمر
افتكرني

لما تحس انك تعبان
وجواك بركان
وشلالات ألم وحرمان
ولما تحلم بنور الشمس
ويصعب عليك
تفرق بين اليوم والامس
لما قلبك يحتاج لحنان
ورعاية وعطف وامان
ويتمنى ايد تتمد
تشيل من جواه
الاهات والاحزان
لما تشوف نفسك
وتلاقيك غريب عن نفسك
وتيجي تسمع صوتك
ما تلاقي غير همسك
افتكرني

لما يتولد جواك
في اليوم مليون سؤال
وتفضل محتار
وحياتك تتملي هموم
وتفكر تغير المحال
وتكتشف انك عاجز
لما تضيع من قلمك الحروف
ويسيطر على تفكيرك الخوف
وتكتشف ان الذكريات
مرسومة جوه جدران قلبك
مهما تحاول تنساها
لسه عايشة جواك ذكراها
افتكرني

لما تبتسم ابتسامة مغصوبة
وتحس ان الضحكة بقالها زمان
منك مسلوبة
وانك ضحية زمن غدار
بسببه صارت حياتك
كلها عذاب ومرار
لما تصحى من نومك مفزوع
وتلاقي عنيك مليانة دموع
 افتكرني